Buruz behera

Ikasleak atlas bat hartu du eta bila hasi da: Kairo, Tunez, Rabat… Denak toki berean. Denak arabiarrak. Denak musulmanak. Denak diktadurak… Gu, berriz…

Aitona hurbildu zaio eta buruz behera jarri dio atlasa. Esan dio imajinatzeko mundua pieza berdinez osatutako puzzle baten gisa. Nahasteko piezak eta eraikitzeko mundu berri bat. Imajinatzeko iparrean zegoena hegoan, ekialdeko hiri bat sartaldean. Egipto Danimarkan eta alderantziz. Peruko oihan batean galduta zegoen hizkuntza bat Europako bihotzean. Erlijio animista baten lurraldea gaur Vatikanoa dagoen tokian…

Aitonak eransten dio: «Munduan Berri diren toki guztietan (New York, Nouvelle Calèdonie, Nuevo Laredo) izena duk gordetzen duten bakarra jatorrizko hiritik…».

Orain arte egin ez zituen galderak egiten hasi da ikaslea, malgutu egin zaizkio kultur errepresentazioak, erlatibizatzen hasi da mundu-ikuskeraren pieza bateko mapa.