«Zer gehiago egin behar dugu?». Hori da askotan emakumezkoen berdintasunaren aldeko lanean ari direnen taldeek haserre, arrazoi guztiarekin, gizarteari egiten dioten galdera; gehiago daukana oihutik galderatik baino.
Egindako lana ez da askotan nahikoa izaten, eta horrela da emakumeen berdintasunaren aldeko borrokan. Hilketak, sexu erasoak, bortxakeria... dira epe laburrean ezabatu behar direnak, ondorioak epe luzeagoan edukiko dituzten egiturazko aldaketak bultzatzearekin batera.
Etsigarria izan liteke, esate baterako, azken urteetan eskoletan egin duten ahaleginarekin, ikustea ez direla oraindik desagertu ikasle batzuen artean matxismoa eta eskolakide emakumezkoenganako mespretxua.
Gaurko M-8aren harira, komenigarria da jakitea lantegi batzuetan hasita daudela, lanorduen barruan, genero ikastaroak ematen gizonezkoentzat. Gizonezkoak egunero zazpi-zortzi ordu elkarrekin igarotzen dituzten lekua egokia izan liteke horrelako formazio saioak emateko.
Gizonok gara, askogatik, lanik handiena daukagunok gure mentalitate eta jarrerak aldatzen. Beraz, lan berezia egin beharko da lantegietan gizonokin. Urteetan pilatutako mentalitatea eta jarrerak ezin ditugu gizonok aldatu eslogan batekin edo urtean behingo gogoeta batekin.
Lan jarraituagoa behar da, eta lantegietan.
