Fetitxeak

Kafka sekula irakurri ez duen bat Kafkaren kamiseta batekin etorriko zaizu Pragatik. Pessoari buruz deus ez dakien batek ez du À Brasileira kafetegitik pasatu arteko onik izango Lisboara egindako txangoan. Hiri bakoitzak bere fetitxea bilatzen du, souvenir dendetako salmenten pizgarri.

Egunotan, Ken Folleten promozio-bisita aprobetxatuz, eskultura bat inauguratu dute Gasteizen, eta hor ikusi dugu Ken Follet haragizkoa hainbat argazki eta telebistetan besoa pasatzen ziola Ken Follet brontzezkoari. Idazlearen meritua: Gasteizko katedrala bere azken nobelara ekarri izana.

Agian ez du gaiarekin zer ikusirik -edo agian badu, nondik begiratzen zaion-, baina harrera kanpo eder horrek zera ekarri dit gogora: orain urte batzuk Patxi Zubizarreta haragizkoak katedral berean oinarritu zuen narrazio ederra.

Beso adeitsua pasatu diot bizkarretik brontzeak baino gutxiago pisatzen duen metaforari.