Hatz jokoa

Mundua begirada batean kabitzen da. Ur-tanta txiki batek zeru osoa isla dezake.

Eta eskuan omen daukagu gorputz osoaren mapa, hala esaten ziguten esku-iragarleek. Guk ez genien sinesten, eta esku-irakurleak ia guztiz desagertu ziren. Orain, ordea, askotan ikusiko dugu berriro eszena zaharra: neska batek mutil baten eskua hartu du, badirudi neska iragarpen klasikoak egiten hasiko zaiola: «Marra luzeenak dio zorion betea transmititzeko gaitasuna duzula…», eta abar. Hori baino prosaikoagoa da, ordea, neskaren jarduna, mutilaren hatzak neurtzen hasi baita metro batekin. Egunkarian irakurri berria duen ikerketa zientifiko baten arabera, hatzen luzerak zerikusi handia omen du zakilaren luzerarekin ere, eta mutilaren txitxiliaren berri jakin nahi du neskak, eta horretan ari da, marra luzeenaren iragarpena eta hatzen luzeraren informazioa bat datozen jakin guran, inportantea baita, eta kuanto!, zoriona…