Aurreskurik ez meskitan

Bilboko Udalak nabarmen mugatuko du otoizlekuak zabaltzeko aukera: debekatu egingo du elizak, meskitak eta bestelako otoizlekuak jendea bizi den eraikinetan irekitzea. Etxepeetan zabaldu dira, hain zuzen, azken urteetan otoizleku berri gehienak, izan meskitak, izan eliza ebanjelistak... Katolikoen elizak aspalditik daude dauden lekuan, gero eta hutsago, eta ez dute etxeperik behar.

Udalak, beraz, erlijio nagusia babesten jarraituko du, eta oztopoak jarriko dizkie erlijio txikienei. Zergatik? Otoizleku berrien sorrera «arautzeko». Ricardo Barkala Hirigintza zinegotzi ohiak —Enplegu sailburuordea da orain— azaroan onartu zuen otoizleku berriek inoiz ez dutela arazorik eragin, baina orain udalak arau bihurtuko du zenbait herritarrek, aurreiritzietan oinarrituta, eskatutakoa.

Iñaki Azkunak hirigunetik kanporatu nahi ditu gure artean txikiak eta ezezagunak diren erlijioak; aldiz, Begoñako Ama Birjinari aurreskuak dantzatzen eta krisitik ateratzeko laguntza eskatzen jarraituko du eliza dotoreetan.