Gauzak ez nahasteko. Horixe eskatu dute Euskadiko Futbol Federazioko arduradunek, euskal selekzioak eta Venezuelak abenduaren 29an jokatuko duten partidaren aurkezpenean.
Euskal Herriaren eta Euskal Autonomia Erkidegoaren lurralde errealitatea nahastu egiten direla iritzita, beraiek EAEra mugatzen direla argitu du Jon Ander Ganboak. Eta erantsi du federazioaren batzarrean Gabonetako partida berreskuratzeko eskatu zietela 450 klubek; ez Nafarroako edo Ipar Euskal Herriko eragileekin harremanetan jartzeko. Harremanetan ez jartzeko eskatu ote zieten klubek, ez du argitu.
Ofizialtasunaren alde daudela ere argitu dute federazioko arduradunek. Eta, esan ez duten arren, uler daiteke EAEko selekzioaren ofizialtasuna dela aldarrikatzen dutena. Venezuela edo Brasilen aurka jokatu beharrean, Murtziaren edo Kantabriaren aurka jokatuko lukeen selekzio batena. Flañok, Monrealek, Josetxok, Puñalek eta Azpilikuetak lekurik izango ez luketen selekzio batena. Eta Orbaizek eta Javi Martinezek ere, hobe ez. Gauzak ez nahasteko.
HIZPIDEAK. Xabin Makazaga
Federazioa, bertan goxo
Iruzkinak
Ez dago iruzkinik
Ordenatu
