Espainiako hedabideek arreta berezia jarri zioten Burlatan guardia zibil batek eginiko keinuari. Ekinen aurkako operazioan atxilotua, Iker Moreno eskuburdinak bizkarrean lotuta zeukaten, polizia auto baten barruan. Guardia zibil batekin hizketan ari zen, eta, une jakin batean, atxilotuari betaurrekoak ondo jarri zizkion guardia zibilak, erortzen ari baitzitzaizkion. Atzamar batekin keinu sotila egin zuen. Eta ikusi egin zen. Erakutsi egin ziguten.
Handik aurrerakoak, baina, ez ditugu ikusi. Asteartetik inkomunikatuta eduki dituzte hamar atxilotuak. Eta susmoak bete egin dira. Guardia Zibilaren esku egon diren zenbait atxilotuk torturak salatu dituzte. Morenok ere bai. Abokatuari azaldu zion inkomunikazio aldiko amesgaiztoa: poltsa hainbat aldiz, kolpeak, guardia zibilak trumilka bere gainera botatzen...
Hori guztia, baina, ez da ikusi. Ezin izan dugu ikusi. Eta hala izango da aurrerantzean ere, ezkutukoa, inkomunikazio aldiak jarraitzen duen artean. Bien bitartean, jende askok gogoan gordeko duena betaurrekoen keinua izango da.
Hizpideak
Ikusten ez dena
Iruzkinak
Ez dago iruzkinik
Ordenatu
