Onik

Orain ez da oporretarako ere behar internazionalismoa. Hegazkinak merke daude, mundu guztiak nahi ditu turistak herrian. Dirua uzten omen dute. Eta zer ekartzen dute trukean, zertan laguntzen du turismoak? Flandriako Brugge hirian festibal bat ari dira egiten egunotan. Bertako zuzendari Filip Strobbek, hiria eta herritarrak gogoan, hauxe esan du: «Unescoren diktadurak bizirik lurperatuko gaitu. Bruggek XXI. mendeko hiria izatea merezi duela uste dugu askok, eta ez aire libreko museoa. Unescok izoztu egin nahi gaitu».

Baten batek behin idatzi bezala, turistak ez du mundurik espero. Turistak ez du ezer jakin nahi, ondo pasa, argazki batzuk egin eta etxera sano itzuli nahi du, edo hobeto esanda, joan zen bezalaxe itzuli nahi du etxera, kezkarik gabe.

Internazionalismoa turismoaren aurkako jarrera ere bazen, beraz. Ez dakit noiz joan zen pikutara. Berdin dio. Erabateko turistak gara orain. Irakurri egunkaria. Hartu goiburuak. Indonesian tsunamia: ehunaka hildako eta beste hainbeste desagertu izanagatik, herrialde bakoitzeko hedabideak bertakoen bila dabiltza, onik ote dauden, zer gertatu ote zaien. Eta horixe da albistearen goiburua: onik dago gurea. Besteak, izorra daitezela.