Oporraldiak

Sakabanaketaren ideologoei bururatu ez zitzaielako, eta dagoeneko beranduegi da; tira, edo ez, erantzuna astebetean. Kartzela itxurako gurutzaontzi britainiar bat, edo gurutzaontzi itxurako espetxe britainiar bat, ibili badabil egunotan itsasoan barrena, nazioarteko uretan, suposatzen dut, barnean itxita daudenen egoera legalaren ispilu fidelena izatearren.

Hor dabiltzanak ez baitira preso, ez baitira oraindik preso, (asiloa eskatu duten erbesteratuak dira!), baina haiena delitu batekin parekatzeko prozesu mentala abian da aspalditik. Motibazio politikorik gabe (herrialde pobreetatik, bien entendu) erbesteratutakoak ere, etorkinak alegia, zaku berean sartuta edo sartzeko bidean daude. Momentuz, itxuraz dira preso. Non edukitzen dituzten, nola ikusten ditugun. Espetxean dagoena zer izanen da, ba?

Oin bat Europan jarri eta legeak babestuko bide zituenez (oraindik, eta behinik behin) hobe inorena ez den lurrean (edo uretan) ibiltzea. Linboan. Susmagarriei dagokien eremuan. Erantzukizuna ez da inorena. Eta horregatik ez gutxitan atxilo-toki horiek ere ez dira publikoak. Argazkietako gurutzaontzi barroteduna, esaterako, enpresa pribatu batek kudeatzen du. Horrek ez du bertako egonaldia nolabait oporraldi egiten?