Ondasunak

Han-hemen, eliza hainbat ondasunen jabe egin da berriki. Ia modu klandestinoan gertatu da dena. Infernukotzat jotzen genituen teknikekin. El Rotoren atzoko binetan, aingeru bat ikusi genuen zerutik oihuka: «Jauna, elizak bere izenean inskribatu du zerua!». Baina El Rotoren aingerua lurrera begira ari da abisua ematen, eta ez jaunaren eremu goienetara. Guri ari zaigu aingerua, eta ez goi-goikoari: pentsa liteke binetan aipatzen dena ez dela zeru espirituala, egunotan euria hain erruz eta hain sarri oparitzen ari zaigun zeru fisiko horixe baizik. Ondasun material bat. Nafarroako hainbat herritan dauden ehunka eta ehunka eliza eta ermitak bezalakoa. Edo Aizarnako apaiz-etxearen antzekoa. Dirutan neurtu litekeen pagotxa bat, txanponen ispilu distiratsuan islatzen dena. Neurgarria, ukitzen dena, banketxeetan biziki estimatzen dutena.

Aberastasun bat.

Gizaki arruntok —elizak ere bai nonbait— zerutzat daukaguna.