Sarrailak

Gizakiak beharrezkoa du loa, nahiz lotan dagoenean babes-ahalmen guztiak galtzen dituen eta ez den erreakzionatzeko gai. Sortu zenetik, animalien mende egin izan du lo kobazuloetan; etsaiak atezuan zituela gerretan; gaitzaren arriskupean izurriteetan. Elias Canettiri harrigarria zitzaion gizaki lotiak gaur arte iraun izana.

Aingeru guardakoaren eta etxeko ateak zabalik zituen tradiziotik gatoz, eta oso urrutikoak egiten zitzaizkigun hiri handietako etxe asko bunker guztizkoak bihurtu izanaren albisteak. Geurera ere iritsi da, ordea, gau-lapurren izua: lo zaudelarik, etxean sartu eta dena husten omen dute, eta esnatzen bazara, hobe, zer gerta ere, lokartuarena egitea. Horregatik, etxea barrutik giltzatzen hasi gara, alarmak jartzen, bizitza egunerokoari sarraila alimaleko baten forma ematen.

Segurtasuna agintari: lapurrei diegu izua; hainbat lapur eragin eta askatasuna murrizten digun sistemari, nonbait, ez..