Su gabe

Ordutik gauzak ez dira asko aldatu, ez gara lehengora itzuli, onartu bezala egin du langileak nagusiaren hitza, beste aukera ixtea da, lana dagoenean deituko dizugu, bitartean egon lasai, eguraldi ona eman dute hurrengo asterako, zer esaten zaio langileari astean behin azaltzeko esaten zaionean, zeure denboraren jabea zara orain, gauzak gaizki doazelako, ez dakigu zer gertatu den, laster konpontzea espero dugu, zer esaten zaio langileari kalera bidali aurretik, ulertu ezazu, enpresa gaizki dabil, irabaziak ez dira guk uste bezala hazi, geu gara kaltetuenak, zer esaten zaio langileari, mundua aldatu egin da, merkeago atera behar dugu produktua, prezio hauetan ezin dugu saldu, ezin dugu bezerorik lortu, soldatak jaistea beste erremediorik ez da geratzen, zer esaten zaio langileari.

Auskalo noizko kontua den, magma hoztua da iragana, harri beltz lakarra, dena bat eta bakarra. Aspaldian ikusi gabeko adinkidea tokatu zitzaidan autobusean. Aspertu egin nintzen tailerrean eta utzi egin nuen. Ikasketak bukatu nituen, ikastaro bat egin nuen; orain Kutxan ari naiz lanean, leihatilan. 24 maila daude, eta goiko laurek beste 20ek batera baino gehiago irabazten dute.

Magma beroa da oraina.