9a zailtasuneko bide bat bistaz eskalatzea da, egun, Adam Ondra eskalatzaile txekiarrak dituen helburu nagusietako bat. Patxi Usobiaga eskalatzaile ohiak gomendatuta, Baltzolako koban (Dima, Bizkaia) egon zen, herenegun. Il Domani bidea zuen jomugan, baina, azkenean, baldintza txarrez jabeturik, urrirako uztea erabaki du. Hala ere, ez da eskalatu gabe joan; Chambao bidea eskalatu du bistaz, 8c+ zailtasunekoa.
"Urte hau haitzetan bide gogorrak kateatzeko aprobetxatu nahi dut, datorren urtean gorputz eta arima entrenamenduei eskaini eta txapelketetan emaitza onak lortzeko", esan du Ondrak.
Orain arte kateatu diren bi bide gogorrenak (Change eta La Dura Dura) eskalatu dituen bakarra da, egun, Ondra. Eskalatutako bideez eta haren asmoaz hitz egin du BERRIArekin. Elkarrizketa osoa biharko egunkarian argitaratuko da.
