Hiru jardunaldi baino ez dira jokatu Espainiako Lehen Mailan, baina, datorren astean partidarik izango ez denez, hausnartzeko beta izango dute taldeek. Alavesi dagokionez, ondorio gehienak baikorrak dira. Jokoan izandako lehen bederatzi puntuetatik lau bildu ditu, eta azterketarik zailenean ez du hutsik egin: gaur Atletico Madril izan du bisitan, eta Mendizorrotzako harresia zutik mantendu du Eduardo Coudetek zuzentzen duen taldeak. Lehen zatian ez da aurkaria baino gutxiago izan, ez markagailuan, ezta zelaian ere. Azkar ihardetsi dio Giulianok sartutako gol goiztiarrari. Espainiarrek okerreko hankarekin ekin diote ligari, eta ez dira gai aldeko markagailuei eusteko. Alavesi, ordea, berdinketak ez dio ihes egin. Gogotik egin behar izan du lan horretarako, baina ahalegina ez da alferrikakoa izan.
Coudet gustura zen taldeak lehen bi jardunaldietan emandako irudiarekin, eta, hartara, aldaketa bakarra egin du hamaikakoan: Moussa Diarra sartu du Victor Paradaren ordez. Bada, arabarrek jarraipena eman diote orain arte erakutsitako lehiakortasunari. Bisitariek azkar hartu dute aurrea, baina etxekoen erreakzioa berehalakoa izan da. Modu horretan, ezerezean utzi dute Giulianok seigarren minutuan sartutako gola. Alaveseko jokalari ohia jokaldiaren hasieran, garapenean eta amaieran agertu da. Errebotez jositako jokaldia izan da, eta Siverak ezin izan du jaurtiketa gelditu, baloia ezker oinarekin ukitu arren.
Lapurtu eta apurtu; antzeko estrategia erabili nahi izan dute bi taldeek. Planari etekina atera dio Atleticok lehen golean. Alavesek, ordea, beste baliabide bat erabili du neurketa orekatzeko: geldikako jokoa. Prestatutako korner bat izan da berdinketaren jatorria. Sorlothek penalti inozoa egin dio Tenagliari, baloia urrundu nahirik, eta Carlos Vicentek maisuki gainditu du Oblak.
Berdinketak berdintasunari eman dio bide. Tarte batez aurkariaren zelaian jokatzeko borondatea izan du Alavesek, jokaldien lanketa egokia eginez. Defentsan, Siverak ez du eskularruak zikintzeko beharrik izan. Julian Alvarezek fantasiazko pasea eman dio Sorlothi atsedena ate joka zela, baina norvegiarrak kale egin du atezainaren aurrean.
Harmailetara begira
Neurketa brastakoan eten da bigarren zatiaren hasieran. Izan ere, ondoezik zegoen zale bat artatu behar izan dute. Jokoa geldirik egon da ohatilan estadiotik atera duten arte. Hutsarteak on egin dio Atleticori, eta beste erritmo batean jokatu du hortik aurrera. Alavesek atzerako urratsak egin ditu, baina betiere sendotasunari eutsiz. Atzelariek pareta eraiki dute area barruan, eta Siverak bikain egin ditu zaindari lanak.
Hori bai, atezaina gaizki atera da bi kornerretan, eta huts horietako baten ondoren baloia zutoinera bidali du Griezmannek. Diego Simeonek pizgarri gisa zelairatu du frantziarra, eta jokaldirik arriskutsuenak haren oinetatik igaro dira. Sorlothi bi erdiraketa bikain bidali dizkio, baina Sivera gaindiezina izan da. Arabarrek akitzeraino egin dute lan markagailuari eusteko. Protesonik min hartu du, eta, hura ordezteko, debuteko minutuak jokatu ditu Denis Suarezek. Jonnyk ere kili-kolo bukatu du lehia. Esfortzuari, azkenean, etekina atera dio Alavesek.
ALAVES-ATLETICO MADRIL
Alaves. Sivera. Jonny Otto, Tenaglia, Garces, Diarra (Gebara, 57. min); Blanco, Pablo Ibañez (Protesoni, 79. min; Denis Suarez, 89. min); Carlos Vicente, Aleña, Guridi (Parada, 57. min); eta Toni Martinez (Mariano, 79. min).
Atletico Madril. Oblak; Llorente, Le Normand, Lenglet, Hancko (Gallagher, 72. min); Giuliano Simeone (Koke, 88. min), Barrios, Cardoso (Ruggeri, 72. min), Almada (Griezmann, 72. min); Julian Alvarez (Raspadori, 88. min) eta Sorloth.
Golak. 0-1. Giuliano Simeonek (7. min). 1-1. Carlos Vicentek, penaltiz (14. min).
