Bordeleko Girondinsen aurka UEFA Kopako kanporaketan egindako ahalegina larrutik ordaindu zuen Osasunak Espanyolen aurka, Nafarroako Erresuman jokatutako Ligako azken jardunaldian -0-2 galdu zuen-. «Zenbait jokalarik atsedena behar dutela agerian geratu da gaur», esan zuen Zigandak partida ostean eman zuen prentsaurrekoan. Asteazkenean, berriz, ezohiko jokalarien eta bigarren taldeko gazteen aldeko apustua egin zuen Getaferen aurka Espainiako Kopan jokatzeko. Ricardo, Milosevic, Soldado, Corrales, Puñal eta Juanfranentzat partida bakarreko astea izan da hau, aspaldiko partez ez baitziren aritu Kopan. Javier Flañok, Krutxagak, Josetxok, Nekunamek eta David Lopezek ez zuten jokatu Espanyolen aurka, ezta Getaferen aurka ere. Santanderrerako, ordea, prest ikusten ditu berriz denak Zigandak. Partida bateko atsedena izan dute gaur hasieratik ariko diren hamaika jokalarietatik seik, eta beste bostek, bi partidakoa.
«Inoiz ez dago jakiterik atsedenak nekea erabat gainditzeko balio izan ote duen ala ez, baina entrenamenduetan ondo ikusi ditut, eta, azken hilabete gorabeheratsuaren ostean, jendea berreskuratzen hasi behar dugu», esan zuen atzo Osasunako entrenatzaileak bere erabakia arrazoitzeko. Eta atsedenak jokalariei mesede egin izana espero dute osasunazaleek; izan ere, gaur galduz gero, etorkizuna erabat ilunduko zaio taldeari.
UEFA KOPAN PENTSATU GABE. Asteazkenean UEFA Kopako final-zortzirenetako partida jokatu behar du Osasunak Glasgown (Eskozian) Rangersen aurka, baina gorritxoentzat gaurko partida da orain garrantzitsuena: «Etxean azken bi partidak galdu ondoren, jaitsiera postuekin genuen alde guztia galdu dugu, eta egutegi gogorra dugu aurretik. Okerrak egin ditugu, eta oker horiek zuzentzen ahalegindu behar dugu. Biharko [gaur] partidan jarri dugu arreta guztia, Ligako azken txanpan finalak jokatu behar izatea saihestu nahi baitugu. Racingi irabaziz gero, konfiantza handiagoarekin joango gara Glasgowra, baina Liga da garrantzitsuena, eta ez dut UEFA Kopako lehian pentsatzen».
