Atzerapauso galanta

Super Amara Bera Berari izugarri zaildu zaio bosgarren urtez jarraian Espainiako Ohorezko Mailako liga irabaztea. Donostiako taldeak galdu egin zuen atzo Kanaria uharteetan (Espainia), Ro'Casaren aurka (28-26), eta, Atletico Guardesek Elxi 38-21 irabazi zionez, Galiziako taldea da orain lehen sailkatua. Bi puntu ateratzen dizkio Bera Berari, liga amaitzeko bi jardunaldi falta direla. Atletico Guardesek Valentziari egingo dio bisita datorren jardunaldian, eta Bera Berak Prosetecnisa Zuazo hartuko du. Azken jardunaldian, berriz, galiziarrek Granollers hartuko dute, eta donostiarrek Leonen (Espainia) jokatuko dute. Itxuraz, Guardesek dena dauka alde txapeldun izateko. Hanka sartze larria egin beharko luke haren historian lehen aldiz liga ez irabazteko. Horren zain egongo da Bera Bera, gaur-gaurkoz ez baitago bakarrik haren esku txapeldun izatea. Atzo galdu zuen horretarako aukera, partida txarra jokatuta.

Prosetecnisa Zuazok, ordea, irabazi egin zuen, Lasesarren, Leonen aurka (33-25), eta laugarren jarraitzen du sailkapenean, Europarako postuetan.

Asobal ligan, berriz, Helvetia Anaitasunak 26-27 irabazi zuen Guadalajaran (Espainia), eta, horri esker, badauka oraindik aukera laugarren sailkatu eta EHF koparako sailkatzeko. Bi puntura dauka Granollers, eta gol alde hobea, baina nafarrek bi norgehiagoka jokatu behar dituzte, eta kataluniarrek, hiru.

Bidasoak, ordea, burumakur jarraitzen du. Bosgarren neurketa galdu zuen jarraian atzo, Benidormen (Herrialde Katalanak), 28-24, eta oraindik ez du ziurtatu beste urtebetez maila nagusian jokatzea. Hiru puntura dauzka jaitsiera postuak, eta bi jardunaldi falta dira jokatzeko.