Bigarren muturrekoa jaso du

Lau egun eskasetan bigarren kolpea jaso du Bartzelonak. Joan zen larunbatean jaso zuen lehena, Espainiako Ligan, 0-2 irabazten joan eta bina berdindu baitzuen Realaren aurka. Atzo beste horrenbeste gertatu zitzaion Milanen aurka, Txapeldunen Ligako ligaxkako lehen partidan. Patok aurretik jarri zuen Italiako taldea partida hasi eta 24 segundo eskasera, baina Bartzelonak buelta eman zion emaitzari Pedrok eta Villak sartutako golei esker. Bazirudien berea zuela garaipena, baina luzapenean Thiago Silvak korner batean buruz sartutako golak zapuztu zituen kataluniarren asmo oro. H multzoko beste neurketan, Viktoria Plzenek eta Bate Borisovek bana berdindu zuten.

Chelseak, ordea, ez zuen huts egin, eta 2-0 irabazi zion Bayer Leverkuseni. David Ruizek eta Matak sartutako golei esker. Londresko taldea da lider E multzoan, Genk-ek eta Valentziak hutsean berdindu baitzuten.

F multzoan, berriz, Olympique Marseilla da lider, atzo Atenasen Olympiakosi 0-1 irabazi ondoren. Lucho Gonzalezek 51. minutuan sartutako golak eman zion garaipena. Norgehiagoka horretan bi euskal jokalari aritu ziren: Cesar Azpilikueta frantziarrekin, eta Fran Yeste eta greziarrekin. Pablo Orbaiz, aldiz, aulkian geratu zen, Ernesto Valverdek hala erabakita. Multzoko beste partidan, Borussia Dortmundek eta Arsenalek bana berdindu zuten. Arsenalen Mikel Artetak jokatu zuen.

G multzoan, berriz, etxeko taldeentzat izan ziren garaipenak. Apoel Nicosiak 2-1 irabazi zion Zenit San Petersburgori, 0-1 galtzen hasi ostean. Gauza bera gertatu zen Porton, Xakhtarrek sartu baitzuen lehen gola, baina etxekoek buelta eman zioten emaitzari.

A multzoko lehia ikusgarriak

Gaur beste zortzi norgehiagoka jokatuko dira. Hiru nabarmentzen dira aurrez aurre izango diren taldeen maila kontuan hartuta: A multzoko biak (Manchester City-Napoli eta Vila-real-Bayern Munich), eta C multzoan, Benficak eta Manchester Unitedek Lisboan jokatuko dutena. Multzo horretan, halaber, Otelul Galati Errumaniako taldeak estreinako partida jokatuko du Txapeldunen Ligan, Basilean (Suitza).