Dominaren bat lortzeko borrokatik kanpo geratu dira Angela del Pan, Amaia Erbina eta Barbara Pla euskal errugbilariak, final laurdenetan Australiak 24-0 irabazi eta gero. Multzoko hirugarren gisa sailkatu ziren final laurdenetara, baina Australia gehiago izan da. 12-0eko abantaila lortu dute ozeaniarrek lehen zatian, eta beste horrenbeste egin dute bigarrenean. Partida osorik jokatu du Plak, eta bigarren zatian aldatu dute Del Pan. Ez du jokatu Erbinak.
Hala ere, ziurtatua dute diploma olinpiarra, zortzi onenen artean baitaude. Orain, bosgarren izatea izango dute helburu. Horretarako, Frantziako selekzioari irabazi beharko diote astelehen arratsaldean (18:30). Lauriane Lissar baigorriarrak ez du jokatu Frantziako selekzioaren porrotean; 26-7 galdu du Zeelanda Berriaren aurrean.
