Lehen Mailako euskal taldeek badute ligako egutegiaren berri. Espainiako Lehen Mailako egutegiaren zozketa egin dute, eta kategoria horretan jokatuko duten euskal taldeek, Alavesek, Osasunak, Athleticek eta Realak, euren bide orriaren berri izan dute. Denboraldia abuztuaren 11n hasiko dute. Bigarren mailan, Amorebietak eta Eibarrek ere asteburu berean ekingo diote ligari, baina ekainaren 28an izango dute egutegiaren berri, Espainiako Federazioko Lehenengo Mailatik zer talde igotzen diren jakin ondoren.
Denboraldiaurrea amaitu, eta berehala izango dute estreinaldia ligan euskal taldeek; abuztuaren 11ko asteburuan, hain zuzen. Athleticek izango du estreinaldirik zailena: San Mamesen hasiko diren arren, Real Madrilen aurka arituko dira zuri-gorriak. Realak ere etxean emango dio hasiera ligari, Gironaren aurka. Osasunak eta Alavesek, berriz, kanpoan ekingo diote sasoi berriari. Arabarrek Cadizen aurka izango dute norgehiagoka, eta gorritxoak Vigon arituko dira, Celtaren aurka.
Azken jardunaldiak ere berebiziko garrantzia izaten du. Izan ere, asko da jokoan egoten dena garai horretan. Hauek izango dira neurketak, maiatzaren 26an: Osasuna-Vila-real, Rayo Vallecano-Athletic, Reala-Atletico Madril, eta Las Palmas-Alaves.
Alavesen igoerarekin, lau euskal talde izango ditugu berriro lehen mailan, eta hamabi derbi jokatuko dira guztira. Lehena bigarren jardunaldian izango da: Osasuna eta Athletic izango dira aurrez aurre, Iruñean. Seigarren jardunaldian, Alavesek lehen derbia jokatuko du, etxean, Athleticen aurka. Derbi bikoitza izango dugu zortzigarren jardunaldian: Alaves-Osasuna, eta Reala-Athletic. Lehen itzuliko azken derbia Osasunak eta Realak jokatuko dute, Sadarren.
