Eibarrek ezin du puntu gehiago galdu Ipuruan mailari eutsi nahi badio

Hamabost partidatan berrogeita bost puntu daude jokoan, eta Eibarrek lauko tartea jan behar dieaurreko taldeei Bigarren B Mailara ez jaisteko. Beraz, puntuak badauzka oraindik denboraldiko helburua betetzeko. Baina salbazioa erdiesteko, ezinbestekoa izango du Ipuruan sendo ibiltzea. Gaur dauka lehen aukera horretarako, Salamanca hartuko baitu.

Oso partida garrantzitsua izateaz gain, berezitasun kutsu handia ere badauka. Izan ere, aste nahasia eduki dute klubean, Carlos Pouso kendu eta Josu Uribe ekarri baitute. Gaur izango du aurreneko partida Eibarrekin entrenatzaile espainiarrak. Atzo egin zituen adierazpenetan, halako egoeretan ohikoak diren hitzak eta esaldiak erabili zituen: «Bizia dugu jokoan, eta zelaira dena ematera aterako gara. Zaleak harro egongo dira taldearekin, guzti-guztia emango dugulako». Baina gogoaz eta kemenaz gain, beste gauza asko ere behar izaten dira partidak irabazteko. Gaur ikusiko da zenbateko aldaketak egin dituen Uribek jokatzeko moduan. Hamaikakoari dagokionez, egin beharko ditu batzuk. Zigor min hartuta dago, eta Pampinek ordezkatuko du atean. Bestelakoan, Ismodes peruarraren debuta nabarmendu behar da, hasieratik aritzeko aukera asko dituelako. Tikok eta Urtzelaik ezingo dute jokatu, min hartuta daudelako.

Salamancak ere puntu premia du, baina igoerako postuetara gerturatzeko. Etxetik kanpo pattal dabil, ordea. Gaur irabazten ez badu, itzuli oso bat egingo du kanpoan partidarik irabazi gabe.



EIBAR-SALAMANCA

Eibar. Pampin; Alvaro Martinez, Alaña, Biel Medina, Ivan Romero; Lombraña, Carlos Ruben, Ismodes, Sutil; Carlier eta Arruabarrena.

Salamanca. Alberto; Gañan, Catala, Rodri, Luciano; Isaac, Jorge; Bustos, Salva Sevilla, Quique Martin; eta Miku.

Epailea. Estrada Fernandez.

Lekua. Ipurua futbol zelaia (5.250 eserleku).

Ordua. 17:00.