"Ez dut izan inolako tentaziorik eskubaloia uzteko. Oraindik gogoa dut jarraitzeko, eta, fisikoki, ondo ikusten dut neure burua". Horixe aitortu zion Eli Pinedok (Amurrio, Araba, 1981) BERRIAri maiatz bukaeran. Hiru hilabete eskas geroago, ordea, iritzia aldatu du. Espainiako eskubaloi selekzioarekin Rioko Olinpiar Jokoetan azken unean dominen lehiatik at geratu izanak ziurrenik izango zuen eraginik. Halere, argi dago Eli Pinedok bazter batean utziko duela baloi txikia, 35 urterekin, hamazazpi urtez maila gorenean aritu ondoren.
Eli Pinedoren erretiroarekin, euskal eskubaloiak azken hamarkada luzeko jokalari onenetako bi galdu ditu denbora gutxian. Izan ere, aurreko sasoiaren amaieran Matxalen Ziarsolok ere, Eli Pinedok urte askoan Bera Beran izandako taldekide ohi eta lagunak, erretiroa hartzea erabaki zuen. Ermuarrak bezala, amurrioarrak ere ibilbide paregabea osatuta esan du agur. Makina bat titulu irabazi du 1999an Bera Berarekin debuta egin zuenetik: taldeen arteko lehiaketan, Espainiako sei liga irabazi ditu (bi Itxakorekin eta lau Bera Berarekin), lau kopa (Itxakorekin bat eta Bera Berarekin hiru), bost superkopa (Itxakorekin bat eta Bera Berarekin lau) eta EHF kopa bat (Itxakorekin); Espainiako selekzioarekin, berriz, bitan izan da Europako txapeldunorde, eta brontzezko domina eskuratu du 2011ko Brasilgo Munduko Txapelketan eta 2012ko Londresko Olinpiar Jokoetan.
Eli Pinedok hurrengo egunetan prentsaurrekoa emango du bere erabakiaren arrazoien berri emateko. Argi dago nolabait baloi txikiari lotuta jarraituko duela, Bea Fernandez taldekide ohiak eta berak London717 arropa denda sortu baitzuten duela gutxi.
