Errukirik gabe, hurrengo fasera

Anberes. Tchouanwoy, Borgers (3), Segers (1), De Weerdt, De Vooght (2), Ruginyte (5), Szilagyi(2) —hasierako zazpikoa—, Rosseau, Fripon (1), Hourau, Pauwels, Haazan, Jassens, Van de Abeele eta Kowalczyk.

Bera Bera. Darly, Altuna (1), Punko (2), Rubio (2), Bea (2), Carvalho (8), Pinedo (5) —hasierako zazpikoa—, Yamiley, Berta (4), Ziarsolo (4), Cuña (3), Mena (1), Campa (5), Menendez (4) eta Arizaga (5).

Markagailua. 0-4, 0-11; 1-12; 2-16; 2-19; 3-22 (atsed.); 4-26; 6-31; 8-33; 10-35; 10-39 eta 14-44.

Epaileak. Crnojevic eta Kostecki Radic (Kroazia). Bi minutuz kanporatuak: Anberesko Pauwels eta De Vooght; eta Bera Berako Arizaga eta Campa.

Bestelakoak. 1.500 ikusle inguru Donostiako Gaska kiroldegian.

Ez zuen ezustekorik nahi, eta horretarako bete beharreko gidoiari ezin hobeto jarraitu zion atzo Bera Berak, Donostiako Gaska kiroldegian. EHF kopako final-hamaseirenetako joanekoa jokatu zuen Anberes talde belgikarraren aurka, eta errukirik gabe, 30 golen aldeaz nagusitu zen (14-44). Zaleek oso gutxitan ikus daitekeen gol kopuruaz gozatzeko aukera izan zuten. Itzuliko neurketa gaur jokatuko da, Egia auzoko kiroldegian (12:00), eta Reyes Karrere gipuzkoarren entrenatzaileak «jokaldi berriak» ikasteko baliatuko du.

Aspalditik zeukan begiz jota Bera Berak atzoko partida. Urte osoa eman du Europako txapelketaren zain, eta Anberes talde belgikarrak sona txikia izan arren, jokalari gipuzkoarrak ez ziren askorik fio. Bi taldeen kalitatean dagoen aldea, halere, lehenengo minututik antzeman zen. Defentsa aurreratua eta kontraerasoari esker, 0-12 aurreratu ziren Karrererenak. Kanpoko taldeak hamalau minutu igaro zirenean sartu zuen estreinako gola, eta datu horrek erakusten du dena. Lehen zatian hiru gol besterik ez zuen sartu. Bera Berak ez zuen barkatu, eta behin eta berriz zulatu zuen belgikarren atea. Atsedenaldira 3-22 iritsi ziren.

Bigarren zatiari ildo beretik ekin zioten bi taldeek. Karrerek, ordea, jokalari guztiei jokatzeko aukera ematea erabaki zuen, eta Anberesek gol gehixeago sartzeko eta emaitza apur bat itxuratzeko baliatu zuen hori. Guztira hamaika gol sartu zituen, lehen zatian baino zortzi gehiago.

Nabarmentzekoa da Bera Berako jokalari guztiek jokatu izana. Karreresek hamabost lagun deitu zituen partidarako, eta denek sartu zuten golen bat, bi atezainek izan ezik. Nagore Arizaga 19 urteko pibotak debuta egin zuen, eta bost gol sartu zituen. Bera Berak sartutako gol erdiak baino gehiago kontraerasoan iritsi ziren.

Final-zortzirenetarako txartela lortuta daukate gipuzkoarrek, eta gaurko itzuliko partida tramite hutsa izango da. Talde indartsua dauka Bera Berak.