«Ez lukete inoiz jokatu beharko. Debekatu egin beharko lukete. Berdintasuna nahi duten feminazi hauek...», horrelako esaldiak entzun ziren ATA Footballek igandean eskaini zuen partidaren zuzeneko transmisioan, jokalariak aldageletan zeuden bitartean. Beste gizon baten ahotsa ere entzuten zen gero, aurrekoari erantzuten: «Niri ez zait, ba, hala iruditzen», dio. Adierazpenak ageri diren bideo bat zabaldu da, eta haserrea sortu du sare sozialetan. Hainbat futbol jokalarik jarrera matxista hori gaitzetsi dute. Ainhoa Tirapu Athleticeko jokalariak, besteak beste, zera zabaldu du Twitterren: «Batzuetan, jarraitzeko gogoa kentzen zaizu. Baina gauza bat esango dizuet. EZ DUTE IRABAZIKO, GEHIAGO GARA! Jarrai dezagun lanean gizarte hobe baten alde. 'Auzika dabiltza, Santxo, aurrera goazen seinale'».
A veces se te quitan las ganas de seguir. Pero os digo una cosa. NO VAN A GANAR, SOMOS MÁS! Sigamos trabajando por una sociedad mejor.
— Ainhoa Tirapu (@AinhoaTirapu) May 18, 2021
“Ladran Sancho, señal que cabalgamos” ðŸÂÂÂÂ’ªðŸ»ðŸÂÂÂÂ’ªðŸ» https://t.co/ZxQeC1SYrO
Maila internazionalean ere, erreakzio ugari sortu du gertakariak. Atletico Madril taldeko jokalari Virginia Torrecillak, esaterako, haserrea adierazi du: «Hau… hau egia da? Mesedez… esaidazue txantxa dela». Sofia Jakobsson Real Madrileko jokalariak honela erantzun dio Torrecillari: «Nik ez nukeen hobeto esango… txantxa bat da? Mesedez… esan txantxa bat dela».
I couldn’t have said it better... is this a joke right? Please..say it’s a joke...
— Sofia Jakobsson (@JakobssonSofia) May 18, 2021
«Neurriak» hartzeko promesa
RTVE Radio Television Españolak barne ikerketa bati ekin dio, emanaldian entzun ziren «iruzkin matxista barkaezin» horien jatorria argitzeko. Proba teknikoak zirenez, sekuentzia hori ez zen eman RTVEko kanal edo plataformetan, ez eta partida zuzenean eskaini zuten Teledeporte eta +TDPn kanaletan ere, RTVEk kaleratu duen komunikatu baten arabera.
Izan ere, Espainiako telebistak zehaztu duenez, emisio horren gaineko eskubideak «ez dira esklusiboak». Hori dela eta, RTVEk «partidaren seinalea eman behar dio RFEFi [Espainiako Futbol Errege Federakundea], Espainiako eta nazioarteko hirugarrenei banatzeko». Horregatik, ATA Footballen emisioan, esaterako, sekuentzia hori ikusteko moduan izan zen.
