"Kudeaketa zailtasunak" onartu ditu Euskal Selekzioaren Federazioak, baina ez du ezer gehiago esan. Iragarri dute laster agerraldia egingo dutela egindako gestioen eta haietan "lortutako emaitzen" berri emateko.
Eusko Jaurlaritzak eta Euskadiko Futbol Federazioak bilera bat egin zuten abuztuaren 28an Bilbon, eta, horren ostean federazioa, ohar baten bidez, jakinarazi zuen urriaren 13an, igandez, San Mamesen, selekzioak partida jokatu zuela Argentinaren kontra, egun batzuk lehenago Lionel Scalonik zuzentzen duen taldeak Alemaniaren aurka Dortmunden adiskidantzazko partida bat jokatuko zuela baliatuz.
Bi egun geroago, ordea, zabaldu zen partida airean zegoela, eta gorabeherak zeudela, Argentinak ez zekiela ezer horren inguruan. BERRIAk egun horretan jakin zuen federazioa horiek bideratzen ahalegintzen ari zela Argentinako Federazioarekin eta partida negoziatu zuten bitartekariekin.
Iazko abenduaren 12an Durango egindako batzarrean, Euskadiko Futbol Federazioak ia aho batez erabaki zuen Nazioarteko (FIFA) eta Europako (UEFA) federazioei eskatzea eskubide osoko kide gisa onartua izatea. Hurrengo egunean iritsi zen Luis Rubiales Espainiako Federazioko presidentearen erantzuna: «Erabat gauzatu ezina da eskari hori». Ordutik ez da berririk egon, baina halako partidekin bide horretan urratsak egiten jarraitu nahi dute, ofizialtasunaren bidean.
Jokatu izan balitz Argentinaren aurkakoa euskal selekzioak FIFAren datetan jokatuko zuen bigarrena izango zen, aurreko urtean Venezuelaren aurka Mendizorrotzan jokatutako partidaren ondoren; aro modernoko 35.a eta aurten jokatutako bigarrena. Maiatzaren 30ean Panaman jokatu zuen, 0-0 berdinduta.
Panamakoa Javier Clementek euskal selekzioari zuzendutako lehen partida izan zen. Bero eta hezetasun handiko lehia izan zen, eta, ondorioz, ia ez zuen erritmorik eduki. Partida hartako deialdia berritasunez beteta egon zen. Zerrendan zeuden hamazazpi jokalarietatik bederatzik lehen aldiz jantzi zuten selekzio nagusiaren elastikoa: Iago Herrerinek, Aitor Fernandezek, Aihen Muñozek Unai Bustintzak, Jesus Aresok, Daniel Vivianek, Gaizka Larrazabalek, Iñigo Vicentek eta Asier Villalibrek. Zenbait arrazoi tarteko, hainbat jokalari garrantzitsu faltatu izan ziren deialdian: Mikel Oiartzabal, Mikel Merino, Igor Zubeldia, Iñaki Williams, Yuri Berchiche eta Iker Munian, besteak beste. Gainera, berriz ere, ez zen Ipar Euskal Herriko jokalaririk egon deialdian. Ikusteko dago orain ere Clementek zer jokalari duen eskuragarri, FIFAren datak baitira.
