Gipuzkoak irabazi du Euskotren ligako lehen estropadan

Euskotren ligari atzo eman zitzaion hasiera, Groven. Horrela, liga baten barnean emakumeen traineru estropada jokatu zen lehen aldiz. Giroa aparta izan zen, eta eguraldiak ere ez zuen aitzakiarik. Hego-mendebaldeko haizeak gogor jotzen bazuen ere arraunean aritzeko egun aproposa zen. Gipuzkoak ezarri zuen markarik onena helmugan, 10.52. Getaria eta Tolosa klubeko arraunlariek hasieratik hartu zuten aurrea. Bizi ekin zioten estropadari, eta erritmo horri eusteko gai izan ziren bi luzeetan. Lehen ziaboga 5 minutu eta 26 segundoan egin zuten. Gipuzkoa denboraldi hasieran sendo dagoela erakutsi zuen.

Gipuzkoa atzematen saiatu zen Galizia, baina ez zen irekitako tartea txikitzeko gai izan. Irabazlearengandik sei segundora egin zuten ziaboga (5.32). Bigarren luzean arraunlariek palakadak bizitu bazituzten ere Gipuzkoakoengandik bost segundora iritsi ziren (10.57). Bizkaia hirugarren postuan sailkatu zen, 11.20ko marka ezarri ostean. Hasieratik aldendu zitzaizkion Gipuzkoa eta Galizia -lehen ziabogan, 5.41 izan zen haren denbora- eta ezin izan zuen aldea murriztu. Katalunia helmugaratu zen azkena, oso atzean, 12.17ko markarekin -ziabogan, 6.14-.

Euskotren ligako bigarren estropada jokatuko dute gaur, 11:30etik aurrera, Pontevedran (Galizia). Gipuzkoak eman zuen atzo denboraldiko aurreneko kolpea, eta gaur norbait erantzuteko gai den ikusiko da. Ligak, orotara, zortzi jardunaldi ditu, eta uztailean eta abuztuan jokatuko dira. Pedreñak (Galizia), Plentziak (Bizkaia), Zumaiak (Gipuzkoa), Getxok (Bizkaia) eta Zarautzek (Gipuzkoa) hartuko dituzte hurrengo estropadak.

Sailkapena

CONCELLO GROVE

1. Gipuzkoa 10.52,56

2. Galizia 10.57,13

3. Bizkaia 11.20,60

4. Katalunia 12.17,26