Igor Anton erretiratu egin da Vueltatik, erorikoa izan ostean

Igor Anton (Euskaltel-Euskadi) Espainiako Vueltako liderra erretiratu egin da probatik, 14. etaparen bukaeran erorikoa izanda; helmugarako sei kilometro falta ziren. Egoi Martinez taldekidea ere jausi da.

40 bat laguneko tropelean aldapa behera zihoazela izan du ezbeharra Antonek, errepide zabal batean. Eskubiko ukalondoa hautsi egin min. Gaur egingo diote ebakuntza, Barakaldoko erietxean. Martinezek lepauztaian hartu min, eta honek ere itzulia utzi egin beharra izan du.

"Alde positiboa ikusi nahi dut", esan du Antonek. "Hamalau egunez zoriontsu izan naiz eta ametsa bizi izan dut. Bi etapa polit irabazi ditut, egun batzuetan lider izan naiz eta itzuli handi bat irabazteko gaitasuna dudala erakutsi dut. Beste batzuetan ere jaso izan ditut kolpeak, eta badakit nola egin aurre".

Antonek (Galdakao, 1983) bi etapa irabazi ditu Vuelta honetan, eta sailkapen nagusian 45 segundo kentzen zizkion bigarrenari -Vincenzo Nibaliri-.

Joaquim Rodriguezek (Katuxa) irabazi du etapa -Burgos-Peña Cabarga, 178 kilometro-, azkeneko mendatean bukaeran ihes eginda. Nibali sartu da bigarren, hogei segundora. Hirugarren, Ezequiel Mosquera, 22ra. Nibali (Liquigas) jarri da lider, eta Rodriguez dago bigarren, lau segundora. Mosquera eta Xavier Tondo dira hurrengoak, 50era.

Orain arteko etapak

- 1. etapa: Sevilla-Sevilla. Irabazlea: Team HTC-Columbia. Liderra: Mark Cavendish.

- 2. etapa: Alcala de Guadaira-Marbella. Irabazlea: Yauheni Hutarovitx. Liderra: Mark Cavendish.

- 3. etapa: Marbella-Malaga. Irabazlea: Philippe Gilbert. Liderra: Philippe Gilbert.

- 4. etapa: Malaga-Valdepeñas de Jaen. Irabazlea: Igor Anton. Liderra: Philippe Gilbert.

- 5. etapa: Guadix-Lorca. Irabazlea: Tyler Farrar. Liderra: Philippe Gilbert.

- 6. etapa: Carabaca de la Cruz-Murtzia. Irabazlea: Thor Hushovd. Liderra: Philippe Gilbert.

- 7. etapa: Murtzia-Orihuela. Irabazlea: Alessandro Petacchi. Liderra: Philippe Gilbert.

- 8. etapa: Villena-Xorret de Cati. Irabazlea: David Moncoutie. Liderra: Igor Anton.

- 9. etapa: Calpe-Alcoy. Irabazlea: David Lopez. Liderra: Igor Anton.

- 10. etapa: Tarragona-Vilanova i la Geltru. Irabazlea: Imanol Erbiti. Liderra: Joaquim Rodriguez.

- 11. etapa: Vilanova i la Geltru-Andorra. Irabazlea: Igor Anton. Liderra: Igor Anton.

- 12. etapa: Andorra-Lleida. Irabazlea: Mark Cavendish. Liderra: Igor Anton.

- 13. etapa: Rincon de Soto-Burgos. Irabazlea: Mark Cavendish. Liderra: Igor Anton.

- 14. etapa: Burgos-Peña Cabarga. Irabazlea: Joaquim Rodriguez. Liderra: Vincenzo Nibali.