Irizarrek eta Zubeldiak parte hartuko dute Espainiako Vueltan

Haimar Zubeldiak eta Markel Irizarrek parte hartuko dute Espainiako Vueltan. Radioshack taldeak taldeko lehen zazpi izenak ezagutzera eman ditu dagoeneko, eta bertan daude bi euskal herritarrak. Movistarrek ere lehen hautaketa egin du, hamabi txirrindularikoa, eta bertan lau euskal herritar daude: Txente Garcia Acosta, Imanol Erbiti, David Lopez eta Beñat Intxausti.

Urteko bigarren itzuli handia izango da Irizar eta Zubeldiarentzat, biek Frantziako Tourrean parte hartu baitzuten. Bukatu ere egin zuten, gainera. Taldeari dagokionez, Andreas Kloeden etaJanez Brajkovic ageri dira taldeburu. Movistarri dagokionez, Erbitiren parte hartzeak ziurra dirudi, baita Intxaustirenak, ez. Lopez maila onean aritu da Burgosko Itzulian, eta litekeena da aukera izatea. Garcia Acostari dagokionez, 39 urterekin, zailago izan dezake. Euskaltelek bere bederatzikoa eman zuen herenegun, eta Rabobankek Juanma Garate aukeratu du. Dena den, litekeena da euskal herritar gehiagok parte hartzea Vueltan, besteak beste, Xabi Zandiok (Sky) eta Arakaitz Duranek (Geox) aukera izan dezakete.

Greipelek, bigarrena

Andreas Greipelek (Omega Pharma Lotto) Eneco Tourreko —Beneluxeko Itzuliko— bigarren garaipena lortu zuen atzo, Arddoieko (Flandria) helmugan. 172 kilometroko etapa laua zen atzokoa, eta alemaniarra nagusitasunez gailendu zen maila handiko txirrindulariak bildu zituen esprintean. Bigarren Tyler Farrar (Garmin) izan zen, eta hirugarren Edvald Boasson Hagen (Sky). Lehen euskal herritarra Koldo Fernandez de Larrea (Euskaltel) izan zen, 25. postuan. Sailkapen nagusian ez zen aldaketarik egon, eta Taylor Phinney (BMC) da liderra, Boasson Hagenekiko hiru segundo aldearekin. Jonhathan Castroviejo (Euskaltel) da lehen euskal txirrindularia, 26. postuan.Gaur 184 kilometroko etapa jokatuko dute Heens eta Ardenen artean. Etaparen erdian Huyko horma ezaguna igoko dute —%9,3ko pendiza du batez beste—.