Irujo gripeak jota dago, eta finalerdia atzeratu du

Juan Martinez de Irujoren eta Olaizola II.aren arteko finalerdia heldu den asteburuan jokatuko da, ziurrenik gaur zortzi, Bilboko pilotalekuan. Gaur zen jokatzekoa, baina Iberokoa atzo sukarrarekin eta gripeak jota esnatu zen, eta enpresari jakinarazi zion. EPELeko epaileak ontzat eman zuen atzerapen eskaera, eta, Irujok okerrera egin ezean, heldu den asteburuan erabakiko da lau t'erdiko bigarren finalista zein izango den. Finalerdiaren atzerapenak, era berean, finaleko egunari eragingo dio, astebetez atzeratuko baita, abenduaren 9ra.

Irujoren atzerapena «ulertzen» duela adierazi zuen Olaizola II.ak, eta ez dela eragozpen handia. «Nik bera sasoi betean egotea nahi dut, eta astebete ez da hainbeste. Nire aldetik, entrenamendu gogor bat egingo dut bihar edo etzi». Partida atzeratu arren, gaurkorako sarrerek berdin balioko dute, baita erreserbek ere. Aldiz, bueltatu nahi dituenak ez du arazorik izango dirua berreskuratzeko. Internet bidezkoak, bihartik aurrera; eta telefono bidezkoak, gaurtik bertatik.