Isuntzak irabazi du KAE 1 ligako lehen estropada, Donostian

Isuntzak jo du aurreneko kolpea KAE 1 ligan. Atzo jokatu zuten aurreneko estropada Donostian, eta Lekeitioko trainerua izan zen onena. Santurtzik egin zuen bigarren. Orio B sailkatu zen ondoren, eta Donostiarra laugarren. Bizkaiko bi ordezkariak batera aritu ziren lehen txandan, eta oso lehia estua izan zuten. Bukaeran, 37 ehuneneko tartea besterik ez zen egon bien artean. Bigarren ziabogan, Santurtzi aurretik zen, baina hirugarrenean, Isuntzak hartu zuen burua, eta alde txikiagatik izan bazen ere, eutsi egin zion lehen postuari.

Isuntza eta Santurtzi faborito ziren, eta txukun aritu ziren. Ezin da halakorik esan beste faboritoez. Zierbena eta Camargo denen ahotan daude, baina atzo ez ziren fin ibili: seigarren eta zazpigarren izan ziren. Ezustetzat har daitezke ere Orio B-ren eta Donostiarraren lana. Indartsuak direla jakina da, baina biek irabazi zuten bere txanda. Gaur bigarren estropada jokatuko dute, El Rasilloko urtegian (Espainia), 12:30ean. KAE 2 ligakoek ere bigarren jardunaldia daukate gaur, Mundakan (Bizkaia), 11:30ean.

Getaria-Tolosa, nagusi

Gipuzkoako Ligako lehen estropada ere jokatu zen atzo Donostian. Getaria-Tolosa nagusitu zen (11.12,43); Zumaiak egin zuen bigarren, 11 segundora; San Juanek hirugarren, 28ra; eta Oriok laugarren, 56ra. Euskotren ligarako sailkatze estropada ere bazen, eta aurreneko biek ordezkatuko dute, txandaka, Gipuzkoa.

Sailkapena

DONOSTIAKO BANDERA

1. Isuntza 20.31,63

2. Santurtzi 20.32,00

3. Orio B 20.51,74

4. Donostiarra 20.53,29

5. Deustu 20.53,70

6.Zierbena 20.53,96

7. Camargo 21.06,40

8. Getxo 21.10,95

9. Hondarribia 21.11,68

10.Trintxerpe 21.27,10

11. Arkote 21.27,33

12. Busturialdea 21.48,33