Kerejeta: «Urduri sumatzen ditugu jokalariak, eta arduratuta gaude emaitzekin»

Dusko Ivanovic eta Josean Kerejeta. Bi pertsona horiei begira geratu ziren herenegun Baskoniako zaleak. Zer esango zuten zain. Ivanovicek gauza gutxi esan zuen partida bukatu osteko prentsaurrekoan, ezkortasuna ez bazen. Kerejeta ugazabak gutxitan hitz egiten du, eta haren esanek sinesgarritasun handiagoa edukitzen dute. Taldeko ugazabak arduratuta daudela onartu zuen: «Etxean jokatutako bi partidak galdu ditugu. Jokalariak urduri sumatzen ditugu aurkaria markagailuan hurbiltzen denean». Lazkaokoak baikortasun mezua helarazi zuen, halere: «Oraindik Top 16rako sailkatzeko aukera, eduki, badugu».