Klasikorik handiena

Egun bakarreko klasiko handiei lau egun gehitzearen parekoa da Munduko Txirrindularitza Txapelketa. Ez da Paris-Roubaix, Amstel Gold Race edo Lieja-Bastogne-Lieja. Ez da egun bakarreko kontua. Astebeteko txirrindularitza festa eta xarma sortzen du urtea joan eta urtea etorri. Denboraldi amaieran beti; izarrez betetako menuarekin beti; lasterketa mugitu eta ikusgarriekin beti. Elite mailakoen kasuan, urtebeterako berotasun ederra ematen du ortzadar maillotak. Eta gazteenentzat erakusleiho aparta izaten da Munduko Txapelketa; munduaren begietara aurkezpen ederra egiteko aukera eskaintzen du. Australian dago aurtengo ispilua, Melbourne eta Geelong artean. Bihar goizaldean hasiko da Munduko Txapelketa, gizonezkoen 23 urtez azpiko erlojupeko probarekin, eta igande goizaldean amaituko da, elite mailako gizonezkoen errepideko probarekin.

Urtetik urtera, gizonezkoen probak lortzen du oihartzunik handiena, baina aipagarria da oso Jeannie Longo frantziarraren kasua. Emakumezkoen erlojupeko proban ariko da bihar, Euskal Herrian 07:00ak direnean, eta errepideko proban lehiatzekoa da gero, larunbatean -litekeena da proba hori iragarri baino lehenago hastea, ordu berean Collingwood eta St. Kilda taldeen arteko futbol australiarreko finala dagoelako-. Longok 51 urte dauzka dagoeneko, eta Frantziako erlojupeko probako egungo txapelduna da.

Faboritoen zerrenda, luzea

Txundigarria da Longoren sasoia, baina emakumezkoen proban zabala da faboritoen zerrenda: Marianne Vos, Noortje Tabak eta Kirsten Wild herbeheretarrak; Tatiana Guderzo italiarra; Emma Pooley eta Nicole Cooke britainiarrak; Judith Arndt eta Ina-Yoko Teutenberg alemaniarrak; Ruth Corset eta Bridie O'Donnel australiarrak...

Gizonezkoen proban, berriz, erlojupekoan Fabian Cancellara suitzarra da faborito bakarra, Richie Porte australiarraren, Erik Larsson suediarraren eta Tony Martin alemaniarraren baimenarekin. Errepideko proban, berriz, zabalagoa da faboritoen zerrenda. Ibilbidea ez da samurra, eta ez du ematen esprinter peto-petoak erritmoari eusteko gai izango direnik. Besteak beste, Philippe Gilbert belgikarra, Filipo Pozzato italiarra, Oscar Freire espainiarra, Thor Hushovd norvegiarra eta Allan Davis australiarra ageri dira faboritoen artean.

Euskal herritarrei dagokienez, iaz baino bi gutxiago lehiatuko dira Munduko Txapelketan. Juanma Garate, Haimar Zubeldia eta Imanol Erbiti elite mailako gizonezkoen errepideko proban ariko dira, igande goizaldean. Eta Mikel Landa 23 urtez azpiko errepideko proban, etzi goizaldean.

Egitaraua

BIHAR

23 urtez azpiko gizonezkoen erlojupekoa (02:00-06:05). 31,6 kilometro.

Elite mailako emakumezkoen erlojupekoa (07:00-08:50). 22,8 kilometro.

ETZI

Elite mailako gizonezkoen erlojupekoa (05:00-09:35). 45,6 kilometro.

OSTIRALA

23 urtez azpiko gizonezkoen errepideko proba (05:00-09:15). 159 kilometro.

LARUNBATA

Elite mailako emakumezkoen errepideko proba (05:00-08:35). 127,2 kilometro.

IGANDEA

Elite mailako gizonezkoen errepideko proba (02:00-08:50). 257,2 kilometro.

EUSKAL HERRITARRAK

Mikel Landa (Murgia, 1989): 23 urtez azpiko gizonezkoen errepideko proban.

Juanma Garate (Irun, 1976): Elite mailako gizonezkoen errepideko proban.

Haimar Zubeldia (Usurbil, 1977): Elite mailako gizonezkoen errepideko proban.

Imanol Erbiti (Iruñea, 1983): Elite mailako gizonezkoen errepideko proban.

*Euskal Herriko ordutegia