Kontxako Banderak osagai guztiak ditu arraunzale ororen festa nagusi izateko, baina bada orain arte falta izan zaion zerbait: doinu gutxi batzuk nahikoa izatea handietan handiena den estropada identifikatzeko.
Bada, gaurtik aurrera, iraileko aurreneko bi igandeetan Donostiako badian ospatzen den estropadak badu kantu propioa. Donostiarrak-Kaiarriba arraun elkarteko arraunlari eta elkarteko kideek aurrera eramandako ekimenari esker sortu dute Donostiako estropadak abestia.
Hain zuzen ere, Donostiarrak-Kaiarriba arraun elkarteko arraunlari Unai Elizasu arduratu da hitzak sortzeaz, eta Lauroba taldeak jarri dizkie doinua eta ahotsa. Elizasu arraunlariaren esanetan, “arraunzaleek bizi duten festa islatzen du abestiak, guztiona den banderarena”.
Abestia grabatzeko garaian, Leire Martinez (La Oreja de Van Gogh), Xabi Solano (Esne Beltza, Fermin Muguruza Kontrakantxa) eta Asier Gozategiren (Gozategi) laguntza izan dute.
Irailaren 1ean, Kontxako Banderaren aurreneko jardunaldian, Lauroba taldeak kontzertua esakiniko du abestiaren aurkezpen gisa. Iluntzeko 20:30ean izango da.
