Laura Garciak jokatutako bi lehiak galduta amaitu ditu jokoak

Espero baino lehen esan zien agur Laura Garcia judokak Londresko Paralinpiar Jokoei, jokatu zituen bi kanporaketak galdu ondoren. Nafarrak Julia Halinska ukrainarraren aurka galdu zuen final-laurdenetan, 48 kilo artekoen mailan. Aurkariak yuko bat lortu zuen lehenik, eta ippon bati esker amaitu zuen lehia gero. Hala ere, porrot egin zuten lau judokek beste aukera izan zutenbrontzea lortzeko lehian jarraitzeko.

Judoka nafarra Victoria Potakova errusiarraren aurka aritu zen, baina galdu egin zuen bigarren aukera ere. Potakovak waza-ari bat lortu zuen, eta horrekin nahikoa izan zuen lehia irabazteko. Hortaz, dominen lehiatik kanpo geratu zen Garcia. Gerora, haren bi aurkariek, Halinskak eta Potakovak, brontzezko domina eskuratu zuten.

Mari Carmen Rubio arku tiralaria ere ez zen oso fin aritu. Sailkatze proban hamabi parte hartzaile ziren, eta bederatzigarren sailkatu zen iruindarra, 637 punturekin. Orain, final-zortzirenetan lehiatuko dira sailkapeneko azken zortziak. Rubio gaur ariko da, Pippa Britton britainiarraren aurka —atzoko zortzigarren sailkatua—, final-laurdenetara igarotzeko asmoz (18:30). Aurrera eginez gero, igandean lehiatuko da, finalerdietan sailkatzeko.

Bestalde, Espainiako saskibaloi selekzioak irabazi egin zuen Italiaren kontra (67-40), eta Asier Garcia getxoztarra oso ondo aritu zen. Hegal pibotak hamabi puntu, lau errebote eta asistentzia bat lortu zituen. Atzoko garaipenarekin, Espainia A multzoko lehen sailkatua da. Gaur jokatuko du bigarren partida, Hegoafrikaren aurka (16:15).

Hiru probetan, lehenengoa

Richard Oribe igerilariak gaur ekingo die Paralinpiar Jokoei. Donostiarra estilo libreko 50 metrokoan lehiatuko da (11:53). Bi txandetako lehenengoan ariko da, eta finalera sailkatzen bada, iluntzean izango da domina baten bila (21:46). Seigarren jokoak ditu Oribek, eta hamalau domina lortu ditu orain arte. Gaurko probaz gain, beste bitan ere lehiatuko da igerilari donostiarra: estilo libreko 100 metro eta 200 metrokoetan.