Sasoia amaituta, hurrengoari begira jarri da Jokin Aperribai Realeko presidentea. Prentsaurrean azaldu ditu kirol arloari dagozkion hainbat gai.
Jokalariak.
Aurten lehen taldean izan direnetatik, ez dute jarraituko Zubikaraik eta Estradak. Biei eskerrak eman dizkie Aperribaik urteotan eginiko lanagatik. Beste talde batzuetan utzita zeuden Ifran eta Cadamuro, eta horiek ez dira Realera itzuliko. Gorka Elustondok denbora eskatu du taldean jarraituko duen pentsatzeko, eta Raul Navas —Eibarren utzita zegoen— Realean ariko da. Gero Rulli atezainak —utzita ari zen Realean— sinatu du taldean jarraitzeko kontratua, eta CD Maldonadok paperak bidaltzea falta da. Jon Ansotegik astelehenean berritu zuen kontratua, eta horretarako hizketan ari dira Aritz Elustondo eta Herviasekin. Ansotegi:
[Youtube]https://youtu.be/QPMsLKQw7jY[/Youtube]
Zurrumurru ugari ere ahotan izan ditu Aperribaik. Danny Ings Ingalaterrako aurrelariaren izena dabil aspaldi bolo-bolo, baina Aperribaik azaldu du ez dela erraza hura Realera joatea, Ingalaterrako talde ugarik egin baitizkiote eskaintzak. Asier Illarramendi Realera itzultzeko aukera ere aipatu izan da, baina "oso zail" ikusten du aukera hori: "Ez da kontakturik egin Real Madrilekin".
David Moyes
Entrenatzaileak sasoia amaitu eta beste urtebeterako kontratua sinatu zuen Donostiara heltzean. "Oso pozik" dago Aperribai Moyesekin, baina ez du harekin hitz egin kontratua luzatzeko.
Loren
Lorenzo Juarros Loren Realeko kirol zuzendariaren kontratua 2017ko ekainaren 30era arte luzatu dute: "Bere gestiotik taldeak gora egin du, nahiz eta aurten helburuak ez bete". Amaitu berri den sasoian eginiko jokoarekin ez da pozik agertu Aperribai, baina azken urteetako ibilbidea gogorarazi du: "Denok sinatuko genuke hiru urtetik bitan Europan aritzea".
BERRIAk apirilean eginiko elkarrizketa batean iragarri zuen Lorenek Realak ez zuela iraultzarik egingo udan.
Zubieta
Zubietan obrak egingo ditu Realak datozen bizpahiru urtean. Zelaiak hobetuko ditu, eta Gaindituko azpiegiturak ere bai. Zubietak zazpi zelai izango ditu arauzko neurriekin.
