Athleticek Lyon (Frantzia), Sparta Praga (Txekia) eta Kiryat Shmona (Israel) taldeen aurka jokatuko du, Europa Ligako multzoko fasean. Monakon izan den zozketan, zuri gorriei I multzoa egokitu zaie.
Zozketa hasi aurretik, zuri gorriak bigarren ontzian izan dira. Besteak beste, Panathinaikos, Fenerbahçe eta Rubin Kazan taldeekin batera.
Marcelo Bielsaren taldeak atzo lortu zuen Europa Ligako multzoetako fasean izateko txartela, HJK Helsinkiren aurka hiruna berdindu ondoren. Europa Ligako multzoetako faseko partidak irailaren 20an hasiko dira. Txapelketa 2013ko maiatzean amaituko da Amsterdam Arenan (Herbehereak).
