Lau t´erdiko final-laurdenetako ligaxkako aurreneko puntua lortu du Aimar Olaizolak, Oinatz Bengoetxeari 22-13 irabazita. Hala ere, emaitzak erakutsi baino partiau estuagoa jokatu dute Asegarceko bi aurrelariek Iruñean, Labrit pilotalekuan. Bengoetxeak konfiantzaz ekin dio norgehiagokari eta 5-11 izan da aurretik. Leitzarrak bizi mugitu du pilota, eta min handia eman dio Olaizola II.ari. Goizuetakoa deseroso sentitu da kantxan, eta asko kostatu zaio tantoa bukatzea.
Bengoetxeak aukera ona izan du tartea zabaltzeko, baina jarraian txapapera botatako bi pilotakadek arnasa eman diote Olaizolari II.ari. Goizuetarrak partida berdintzea lortu du hamahiruna, eta partida bukatu bitarte jaun eta jabe izan da. Olaizolak II.ak mendean hartu du Bengoetxea VI.a, eta leitzarrak aurkariaren bizkarra ikusi behar izan du piloteoan. Momentu horretatik aurrera erraz bukatu ditu tantoak Olaizolak, gehienak airez. Garaipen honi esker, Olaizola puntu batekin da ligaxkako sailkapenean, Olaetxearekin batera. Olaizola eta Olaetxea elkarren aurka arituko dira datorren ostiralean Donostian. Bengoetxeak, aldiz, Ezkurdia izango du kontrario, larunbatean, Etxebarrian (Bizkaia).
