Pala, Asegarceren ingurura

Pala profesionala esku pribatuetara itzuliko da urritik aurrera. Asfedebik atzo jakinarazi zuenez, larunbatetik aurrera Custom Sportek kudeatuko du modalitate hori, eta enpresa horrek hartuko du pilotarien kontratuen ardura. Custom Sport enpresak kudeatzen du Bilboko pilotalekua, eta Iñaki Burutxaga bertako presidentea Asegarceko zuzendari nagusia ere bada. Bi enpresa dira, baina egoera bitxia da, Asegarcek aurretik pala kudeatu zuelako, 1993tik 1996ra. Aro hura pilotarien grebarekin bukatu zen, eta gero pala Eusko Basquek hartu zuen.

«Pilotalekua kudeatzeko baldintzetan agertzen zen enpresak pala profesionala hartu behar zuela, eta guk aktibitate guztia Custom Sportera subrogatuko dugu, eta orain enpresari dagokio kontratuak negoziatzea», azaldu zuen atzo Karlos Lasak, Asfedebi Pilotako buruak, azken hiru urteetan pala kudeatu duen babes publikoko enpresako buruak.

Akordio berriak, Lasaren esanetan, pala profesionalaren iraupena «sei urtez gutxienez» ziurtatuko du. Custom Sportek sei milioi euro jasoko ditu pilotalekua hiru urte eta erdiz kudeatzeagatik, eta akordio horretan pala profesionalari bizirik eusteko gutxieneko kopuru batzuk daude. Horiek hala, pilotalekua hartzen duen enpresak urtean gutxienez profesional mailako bi partidakoberrogei jaialdi jokatu behar direla ziurtatu behar du, eta torneo bat. Aurten, torneoa Bilboko Aste Nagusian jokatu zen.

Akordio horrekin pala profesionala normaltasunera itzuli beharko litzateke, urtebetez ia geldirik egongo ondoren; egun, hilabete daramate jokatu gabe. Bizkaia pilotalekuaren zain, pilotariek hilabete luzeak egin zituzten jaialdi bakan batzuk jokatzen. Halere, jokatuko den hurrengoa Club Deportivon izango da, urri hasieran. Rekalde Zumardiko kiroldegia berritu egin behar dute, eta bertako pilotaleku luzean jokatuko den azken jaialdia izango da. Egun, Asfedebik hogei pilotari ditu, eta ikusteko dago Custom Sportek zenbaten kontratua berritzen duen eta zein baldintzetan.