Athleticek ezin izan ditu ohiturak irauli oraingoan ere. Bartzelonaren aurka lehiatu zen atzo, Montjuic-eko estadio olinpikoan. Partida ia osoan berdinduta egon zen markagailua; lehen zatian ondo jokatu zuten zuten zuri-gorriek, baina bigarrengoan jarraitutasuna falta izan zitzaien. Bi hamarkada pasatu dira Athleticek azkenekoz irabazi zuenetik Bartzelonan Barçaren kontra. Behintzat berdinduta amaitzeko esperantza Marc Guiuk uxatu zuen, partidaren amaiera aldera. Debuta zuen atzokoa: 79. minutuan atera zen zelaira, eta 33 segundo besterik ez zuen behar izan bere lehen gola sartzeko, 80. minutuan.
Pareko aritu ziren bi taldeak lehen zatiaren hasieran. Iñaki Williams izan zen lehena jaurtiketa egiten, areatik at. Bartzelonakoak egoki erantzun zuen jaurtiketak eginez; langak eta Unai Simonek uxatu zituzten Felixena eta Lopezena. Ondoren, Athleticek ere izan zuen aukera gola sartzeko, baina azkarrago aritu zen Ter Stegen Bartzelonako atezaina. 26. minutuan, Yuri Berchichek zelaia utzi behar izan zuen, eta Lekuek hartu zuen haren lekua. Zatia amaitu arte, Iñaki eta Nico Williams gola sartzen saiatu ziren.
Atsedenalditik bueltan, Bartzelonak kontrolatu zuen baloia. Eta hori berretsi zuen 17 urteko Guiu gazteak. Simon saiatu zen gola geratzen, baina ez zuen lortu. Partidako azken minutuetan, Athleticek ez zuen izan aukerarik golik sartzeko; Bartzelona nagusitu zen berriro, eta zuri-gorrien porrota berretsi.
