Simon Spilak nahi eta ahal izan duelako nagusitu da

Hamar bat kilometro falta ziren, atzo, Romandiako Tourreko laugarren etapa, azken-aurrekoa, amaitzeko. Ivan Basso (Liquigas), Morris Possoni (Sky), Christophe Moreau (Caisse d'Epargne) eta Simon Spilak (Lampre) zihoazen buruan. Euripean, izoztuta ia-ia, jadanik 147 kilometro hanketan pilatuta, eta lehen mailako bi mendate gainditu ondoren. Liderraren tropeltxoa, berriz, gertu; 30 bat segundora. Zalantzak sortu ziren, hortaz. Segi ez segi, eta Spilakek jotzea erabaki zuen. Ausart. Aldetxoa ireki, helmugatik gertu zegoen tontortxoa gainditu, eta garaile 23 urteko esloveniarra, Chatelen. Nahi eta ahal izan zuelako. Michael Rogersek (Columbia), berriz, lidergoari eutsi zion.

Lanak izango ditu, ordea, gaur horri eusteko. Lasterketako etaparik gogorrena da azken egunekoa, Sionen hasi eta bukatuko dena (121 kilometro). Lehen mailako hiru mendate igoko dituzte, eta horietako azkena, helmugatik20 kilometrora dagoena, Ovronnaz, gogorra da oso: hamar kilometro da luze, eta %9ko batez besteko pendiza dauka. Hor saiatuko beharko dute Alejandro Valverdek (Caisse d'Epargne), Denis Mentxovek (Rabobank) eta Vladimir Karpetsek (Katuxas), besteak beste, australiarrari tartea jan nahi baldin badiote.

Asturiasko Itzulian, berriz, Beñat Intxaustik (Euskaltel-Euskadu) ezin izan zion atzo lidergoari eutsi, Acebo gainean bukatutako etapan, azken aurrekoan. Fabio Duartek (Colombia es Pasion) eraso bortitza jo zuen helmugatik sei kilometrora, eta, saioa irabazteaz gain, lider jarri da. Gaur jokatuko da azken etapa: Fuentes del Narcea-Oviedo. Menditsua da, eta mugimendua egon daiteke.

Sailkapenak

ROMANDIAKO TOURRA

4. etapa

1. Simon Spilak (Lampre) 4.05.25

2. Peter Sagan (Liquigas) 13ra

3. Philippe Gilbert (Omega) d.b.

4. Hubert Dupont (Ag2r) 15era

5. Alejandro Valverde (Caisse) 22ra

Nagusia

1. Michael Rogers (Columbia) 14.01.48

2. Alejandro Valverde (Caisse) 1era

3. Simon Spilak (Lampre) 5era

4. Vladimir Karpets (Katuxa) 7ra

5. Denis Mentxov (Rabobank) 11ra

ASTURIASKO ITZULIA

4. etapa

1. Fabio Duarte (Colombia) 4.31.34

2. Alex Cano ( Colombia) 16ra

3. Beñat Intxausti (Euskaltel) 1.10era

4. Santi Perez (Loule) d.b.

5. Andre Cardoso (Palmeiras) 1.17ra

Nagusia

1. Fabio Duarte (Colombia) 14.14.18

2. Beñat Intxausti (Euskaltel) 19ra

3. Santi Perez (Loule) 50era

4. Alex Cano (Colombia) 1.02ra

5. Jose Herrada (Caja Rural) 1.03ra