TXIRRINDULARITZA. Haserretu egin delako

Gutxi falta zitzaien Espainiako Vueltako 17. etapa osatzeko. Talavera de la Reinako helmugara iristeko. Ia lau ordu eta erdi zeramatzaten txirrindulariek bizikletaren gainean. Gaztela-Mantxan zehar pedalei eragiten. Markel Irizar (Euskaltel-Euskadi), Lieuwe Westra (Vacansoleil), Martijn Maaskant (Garmin), Fran Martinez (Andalucia) eta Anthony Roux (Francaise Des jeux) aurretik ziren. Halaxe pasatu zuten egun osoa, eta ondo elkar ulertu zuten. Baina azken hiru kilometroetara helduta eta tropela gain-gainean edukita... komeriak. Elkarri begira hasi, eta inork tira egiten ez zuela ikusita, haserretu egin zen Roux. Hori baliatu zuen Maaskantek aurrera egiteko, baina haserrea bideratzeko modurik onena haren atzetik ateratzea zela erabaki zuen Roux. Harrapatu zuen, eta azken metroetan tropela, Columbiako zaldiak gainean edukita ere, garaile iritsi zen helmugara, indar erakustaldia emanda.

Ezequiel Mosquera (Xacobeo) eta Robert Gesink (Rabobank), berriz, larri heldu ziren helmugara, eroriko baten ondorioz. Galiziarra zorabitu ere egin zen hasieran, eta gero esan zuen kaskoak bizitza salbatu ziola; eta herbeheretarrari, berriz, ia ezker hanka osoa lotu behar izan zioten, zauriak medio. Ikusteke dago eroriko horrek zein modutan eragingo dien. Triste bezain haserre zeuden.

Helmugatik gertu haserretzeak, ordea, on egin zion Rouxi, 22 urteko frantziarrari. Eztabaida hutsalean jarraitu beharrean, barruak kiskaltzen zizkion sua irabazteko baliatu zuen. Su horrek indarra eman zion. Irizar, berriz, triste zegoen helmugan. Ondo elkar hartu zutela esan zuen oñatiarrak. Azken kilometroetara fresko heldu zirela. Baina Irizar izan zen zain geratu zenetako bat; besteek zer egin zain, alegia.

Etapa, bestela, nahiko lasai osatu zuten erori ez ziren txirrindulariek. Seigarren kilometroan alde egin zuten iheslariek eta sei minutu pasatxoko abantaila hartutakoan, esprinterren taldeak, Columbia, Milram eta Liquigas, lanean hasi ziren. Ez zieten utzi abantaila gehiago hartzen, baina,azkenean, ez zuten ondo kalkulatu.

Avilako harresiko aldapak

Avilara helduko da gaur Vuelta. Faboritoen artean nekez egongo da lehia handirik hasieran, baina Avilako harresiaren inguruko aldapak aproposak izan daitezke segundoren bat edo beste irabazteko.

Sailkapenak

HAMAZAZPIGARREN ETAPA

1. Anthony Roux (Francaise) 4.28.14

2. William Bonnet (Bouygues) d.b.

3. Andre Greipel (Columbia) d.b.

4. Daniele Bennati (Liquigas) d.b.

5. F. Pacheco (Contentpolis-AMPO) d.b.

24. Iñaki Isasi (Euskaltel) d.b.

29. Ruben Perez (Euskaltel) d.b.

38. David Herrero (Xacobeo) d.b.

45. Haimar Zubeldia (Astana) d.b.

57. Aitor Perez Arrieta (C.-AMPO) d.b.

NAGUSIA

1. Alejandro Valverde (Caisse) 74.27.48

2. Robert Gesink (Rabobank) 31ra

3. Samuel Sanchez (Euskaltel) 1.10era

4. Ivan Basso (Liquigas) 1.28ra

5. Cadel Evans (Silence-Lotto) 1.51ra

14. Haimar Zubeldia (Astana) 13.34ra

29. A. Txurruka (Euskaltel) 43.00ra

30. Arkaitz Duran (Fuji) 47.03ra

31. David Herrero (Xacobeo) 47.51ra

40. J. Garate (Rabobank) 59.08ra