Volokitin xake jokalari ukrainar gazteak ezustea emanda irabazi du Donostian

1911n eta 1912an Donostian jokatutako Supertorneoaren mendeurrena ospatu berri du Gros Xake Taldeak abenduaren 28tik urtarrilaren 5era; Donostia Chess Festival, alegia. Hemezortzi herrialdetako 80 xakelari aritu dira lehian, munduko 40 jokalari onenetatik 11 tartean; Vugar Gaximov eta Shajrriar Mamediarov azerbaijandarrak eta Ruslan Olegovitx Ponomariov ukrainarra, esaterako. Horiekin batera lehian aritu ziren Aleksander Moiseenko, Etienne Bacrot, Arkadij Naidits...

Andrei Volokitin ukrainar gazteak irabazi zuen torneoa —munduko 48.a—, faborito batzuk kanporatu ostean. Ponomariov munduko txapeldun ohia gainditu zuen final-laurdenetan, eta Leinier Dominguez kubatarra finalerdietan, munduko 21.a. Finala ere zaila zeukan Volokitinek, Viktor Laznickaren aurka. Txekiarrak Gaximov torneoko faborito handia eta munduko 10.a kanporatu zuen final-laurdenetan, eta Moiseenko, munduko 35.a, finalerdietan. Laznickak 23 urte ditu, eta Volokitinek 21. Espero bezala, oso parekatua izan zen finala.

Berdinketa hausteko partidetara joan beharko zela ziurtzat jotzen zenean, Laznickak denboragatik galdu zuen beltzetako partida. Txekiarraren haserreak eragina izan zuen ziurrenik beste partidan, eta zuriekin ere pare bat akats egin zituen.

Felix Izetaren itzulera

Euskaldunen artean azpimarratzekoa da Felix Izetaren itzulera, zazpi urteko erretiroaren ostean. Torneo nagusia hasi baino lehen, Euskal Herria-Frantzia lehia jokatu zen, eta Izetak bi partidak irabazi zituen. Bigarren txandan lan zaila zeukan Eric Prie frantziarraren aurka, baina zestoarrak kanporaketa gainditzea lortu zuen. Gaximov torneoko faborito nagusia izan zuen aurrean final-hamaseirenetan, eta bi partidak galdu zituen. Euskal herritarren artean beste inork ez zen igaro bigarren txandatik. Hori bai, Iñigo Martin donostiarrak berdinketa lortu zuen Gaximoven aurka, nahiz eta azerbaijandarrak kanporatu egin zuen gero.