AllMyApps: Windowserako aplikazio biltegia

GNU/Linux eta Ubuntu erabiltzaileak hasieratik ohituta daude ohiko software biltegira joatera eta nahi duten aplikazioa sisteman instalatzera. Oso sistema erosoa eta azkarra da sisteman software berria instalatzeko edo erabiltzen ez den softwarea desinstalatzeko. Gainera, aplikazioen zein sistemaren eguneraketak automatikoki kudeatzen dira software biltegitik. Beste sistema batzuk ere antzeko software biltegiak eta dendak gehituz joan dira, bai ordenagailuetarako bai sakelako telefonoetarako bai bestelako gailuetarako. Apple-en App Store edo Android Market dira adibide batzuk.

Hala, bada, software biltegi horiek duten arrakasta ikusita, Microsoft ezin zen gutxiago izan, eta, iragarri duenez, etortzekoa den Windows 8k ere antzeko software eta aplikazio denda ekarriko du. Hala ere, Windowserako bestelako software biltegiak sortzen hasi dira. Horren adibide bat AllMyApps da (http://allmyapps.com/). Bertatik bilatu eta instalatu ahal dira doako zein ordainpeko aplikazioak MS Windows sistemetarako; gainera, nahi diren aplikazioak aukeratu ahal dira, eta instalazio bakarra egin. Aplikazio bakoitzeko deskribapen bat eta pantaila-argazki batzuk erakusten dira. Oraingoz ingelesez baino ez dago.