EITB taldeak lankidetza hitzarmenak ditu Euskal Herriko hainbat eragilerekin; besteak beste, atzo Gasteizen Artium museoarekin sinatutako lankidetza hitzarmena, «arte garaikidearen esparruan kultur edukiak garatzeko» asmoz egina.
Hona hemen akordioaren helburua: arte garaikidearen ondarea zaintzea eta zabaltzea, artisten lana eta ibilbidea «ahalik eta jende gehienarengana» hurbilduko duen edukiak sortuz.
Hitzarmen horren esparruan, bi erakundeek elkarrekin lan egingo dute kultura garaikidea publiko berrien artean zabaltzeko. Euskal Herriaren testuinguruan, euskal artisten lana zabaltzeko plataformak izango dira, eta egungo gizarteak dituen beharrei eta erronkei erantzuteko sorkuntza garaikidean lantzen diren balioak bultzatuko dituzte.
Artium museoan bertan sinatu zuten akordioa. Han izan ziren Ibone Bengoetxea Eusko Jaurlaritzako Kultura eta Hizkuntza Politikako sailburua, Ramiro Gonzalez Arabako ahaldun nagusi eta Artium Fundazioko presidentea, Beatriz Herraez museoko zuzendaria eta Mari Puri Herrero artista.
Lankidetza aurrera eramateko, garatu beharreko hainbat programa zehaztu dituzte; proiektua bultzatzen duten erakundeen artean osatutako lantalde batek sustatuko du. Akordio esparru honen lehen ekintza zera izango da, Euskal Herriko arte plastikoetako bi artistaren ibilbideetan oinarritutako bi dokumental ekoiztea: Esther Ferrer (Donostia, 1937) eta Mari Puri Herrero (Bilbo, 1942). Ikus-entzunezko lan horiek datozen hilabeteetan grabatuko dituzte, eta urtea amaitu aurretik aurkeztu. «Bi erakundeek euskal artisten lana ikuspegi kritiko eta historiko batetik ezagutarazteko duten konpromisoa indartzen lagunduko dute dokumental horiek», azaldu du museoak.
Ferrer eta Herrero
Esther Ferrer (Donostia, 1937) euskal artista ospetsuenetarikoa da nazioartean. 1960ko hamarkadaz geroztik, ekintzak gauzatu ditu bakarka edo ZAJ taldeko kide gisa. Hamarkada horren hasieran, Jose Antonio Sistiaga margolariarekin batera, lehen Adierazpen Libreko Lantegia sortu zuten, beste jarduera pedagogiko paralelo askoren hazia; besteak beste, Elorrioko (Bizkaia) eskola esperimentalarena. 1970eko hamarkadaren erdialdetik aurrera, berriz ekin zion jarduera plastikoari, argazki landuak, instalazioak, zenbaki lehenetan eta pi zenbakian oinarritutako koadro eta objektuak eginez. 1999an, Manolo Valdesekin batera, parte hartu zuen Veneziako Biurtekoan (Italia); 2008an, Espainiako Arte Plastikoen Saria jaso zuen; 2012an, Gure Artea saria, bere ibilbideagatik; eta 2014an, Velazquez saria. Ferrer Euskal Herriko Arte Garaikidearen Museoko bilduman dago, teknika eta garai bateko eta besteko hainbat lanekin. Tamainari erreparatuta, Números primos (2003-2023) da haren lanik nabarmenena. 10.000 lauzak osatutako zeramikazko zoru bat da, eta museoaren barruko plazan dago instalatuta 2023. urteaz geroztik. Bisitarien topaketarako eta partaidetzarako, praktika performatiboei lotutako programa artistikoak egiteko eta proposamen pedagogikoak garatzeko espazio gisa funtzionatzen du.
Mari Puri Herrerok (Bilbo, 1942) Ascensio Martiarenak Donostian zuen tailerrean hasi zuen bere ibilbide artistikoa. 16 urterekin Madrilera joan zen, Arte Ederren Zirkuluan eta Prado museoan marrazketa eta margolaritza eskolak jasotzera. Madrilen zegoela, linoleuma eta akuafortea lantzen hasi zen. 1966an, Bizkaiko Foru Aldundiaren eta Herbehereetako Gobernuaren beka bat jaso zuen, eta Amsterdamera joan zen ikasketak egitera. 1969 eta 1971 artean Parisen bizi izan zen, eta han korronte figuratiboa ezagutu zuen —ikuspegi sinbolista bat islatzen da haren lanetan—. Bilbora itzultzean, erakusketa ugari eskaini zituen, eta euskal arte eta kulturaren irudi ezagunenetako bat bihurtu zen. 1978an Marijaia sortu zuen, Bilboko Aste Nagusiaren irudi enblematikoa. Artium museoaren bilduman Herreroren hainbat lan daude; haietako bi, Bilduma Hau Colección. Oinarrizko mugimenduak (1950-2000) bildumako funtsen azken berrantolaketan. Gainera, uztailaren 4an museoan inauguratutako Artelekun zehar. 1987-2002. Artxiboan oinarritutako Artelekuri buruzko erakusketa bat erakusketan, artistaren bi litografia daude ikusgai.
