ETB2k %7,5eko ikusle kuota izan du abuztuan, bi urtean bost puntu galduz

ETB2 katearen gainbehera denboraldian zehar ez da handiegia izan, baina aurreko urteko ikusle galera mantendu egin da. Abuztuan, ordea, galera areagotu eta 2011. urteko datu txikiena izan du kateak: %7,5eko ikusle kuota Araban, Bizkaian eta Gipuzkoan. Uztailarekin alderatuta sei hamarreko galdu ditu; iazko abuztuarekin alderatuz, puntu eta erdi; eta duela bi urteko abuztuarekin konparatuz, bost puntu eta hamarreko bat. Urte asko ziren ETB2k ez zuela hain datu txikia lortzen hilabete batean.

ETB1ek, berriz, %2,6ko ikusle kuora izan du abuztuan. Hori da 2011. urtean lortutako bigarren datu onena, apirilekoaren ondoren —hilabete horretan Txapeldunen Ligako Real Madril-Bartzelona eman zuten—. Aurreko hilabetearekin alderatuz, euskarazko kateak puntu erdian egin du gora. Baita iazko abuztuarekin konparatuta ere. 2009ko abuztuan, berriz, %3,7ko kuota zuen ETB1ek.

ETB3 kateak %0,8ko ikusle kuota izan du abuztuan, uztailean baino hamarreko bat gutxiago.

Tele5 da gehien ikusten dena

Araban, Bizkaian eta Gipuzkoan Tele5 da gehien ikusten den katea: %16,5eko kuota. Espainian ere Mediaset taldeko katea da lider, %14,3ko kuotarekin. La1 da bigarrena %13,2rekin, eta Antena3 hirugarrena %11,3rekin. Hiruetatik Antena3 da igo den bakarra. Cuatrok (%5,9) eta La Sextak (%5,1) behera egin dute. Gaikako kateen artean Clan da indartsuena: %3,4. Gertu du Neox, %3,3ko kuotarekin.