Europako Ligako finalak %63,3ko ikusle kuota izan zuen EAEn

Ikusmin handia sortu zuen asteazkenean Athleticek eta Atletico Madrilek jokatutako Europako Ligako finalak. Tele5 kateak eskainitako partidak %63,3ko ikusle kuota izan zuen Araba, Bizkai eta Gipuzkoan (542.000 ikus-entzule). Espainian, berriz, %44,8 izan zen ikusle kuota (8.094.000 ikus-entzule).

Dena den, azkeneko urteetan izan diren beste futbol final batzuen datuetara ez da iritsi Athleticek galdutako finala. Duela lau urteko Eurokopako finalak (Espainia-Alemania) %75,7ko ikusle kuota izan zuen, Bukaresteko lehiak baino 12,4 puntu gehiago. Munduko Kopako finalaren luzapena, berriz, %80,4ko kuotaraino iritsi zen.

UEFA Kopako final batera heldu zen Alaves taldea duela 11 urte. Eta final hark Bukarestekoaren pareko datuak izan zituen: %61,7ko ikusle kuota (528.000 ikus-entzule). TVEk eman zuen Alaves-Liverpool final hura, La1n gaztelaniaz (%50,6) eta La2en euskaraz (%11,1).

Athleticen lehien arrakasta

Denboraldi honetan askok ikusi dituzte telebistaz Athleticek Europako Ligan jokatutako partidak. Hala, final-zortzirenetan Manchester Uniteden aurka jokatutako partidek sekulako datuak izan zituzten: %49,5eko ikusle kuota joanekoak eta %59,9koa itzulerakoak. Final-laurdenetan, Shalke04 taldearen aurkako joanekoak %49ko ikusle kuota izan zuen. Finalerdietako Sporting Lisboaren aurkako partidak ordainpeko kateetan emititu zituzten, Tele5k Valentzia-Atletico Madril finalerdia eman baitzuen.

EITBk, berriz, programazioko ordu ugari bete ditu azkeneko asteetan Athleticekin. ETB2 kateak asteazkenean eman zuen Athletic directo saio bereziak %12,7ko ikusle kuota izan zuen.

Hamaika Telebistan ere lan berezia egin dute egunotan Athleticen finalaren inguruan, eta eduki batzuk www.hamaika.tv wegubnean ikus daitezke. Asteburuan ere emango dituzte errepikapenak.