YouTube bideo biltegiak euskaraz egiten ikasi du, azkenean

Ustekabean etorri da, iragarpenik gabe. Munduko bideo biltegirik handienak euskaraz egiten die azkenean horrela nahi dutenei. Aski berandu dator neurria, halere. Katalana eta galiziera aspaldi gehitu zituen.

Ustekabea izan da, besteak beste, inor gutxik zekielako lan horretan ari zirenik. BERRIAk informatikaren munduko hainbat adituri galdetu die horren inguruan. Horien arabera, litekeena da neurria Googlek eta Eusko Jaurlaritzak eginiko itun orokorraren ondorioa izatea. Hitzarmen horri jarraiki, lehenbizi Gmail posta zerbitzua euskaratu zuten, eta gero beste produktuak. YouTube euskaraz ikusi nahi duenak hizkuntza aukera dezake gunearen behealdean. Halere, hobe da nabigatzailea euskaraz konfiguratuta edukitzea, guneak jakiteko zein den erabiltzailearen aukera.