Batek puntua jarri, eta besteak erantzun. Hala laburbildu daiteke Lankuk abiatu duen Buruz buru izeneko proiektuaren mamia. Hainbat kultur adierazpidetako zazpi lagun jardun dira abiapuntuak, galderak edo gogoetarako gaiak jartzen, nork bere bikotekideari. Eta zazpi bertsolarik hartu dute norberari proposatutako galdera erantzuteko ardura. Baina ez dute beren ohiko moldean erantzun, baizik eta hitz lauz idatziz. Ariketaren emaitza zazpi liburuxkatan eman dute argitara, denak kutxa batean bilduak. Malen Amenabar ilustratzaileak ondu du diseinu osoa.
Joseba Sarrionandiak, Uxue Alberdik, Gorka Urbizuk, Nerea Ibarzabalek, Ruper Ordorikak, Onintza Enbeitak, Eneko Sagardoik, Danele Sarriugartek, Igor Elortzak, Andoni Egañak, Ilaski Serranok, Julio Sotok, Maite Berriozabalek eta Manex Agirre parte hartu dute proiektuan. Askotariko gaiak izan dituzte hizpide sortzaileek beren solasaldietan. Eta horiek hartu duten forma ere ez da beti bera izan: zazpi idazlanetatik hiru ipuinak dira, eta lau saiakera laburrak.
Plazaratutako kutxa lehena izan bada ere, proiektuari jarraipena emateko gogoa agertu dute bai parte hartzaileek bai Lankuko kideek ere, beraz, litekeena da etorkizunean segida izatea. Kutxa Durangoko Azokan eskuratzeko aukera izango da, Lanku eta Bertsozale Elkartearen standean. www.lanku.eus atarian ere izango da eskuragarri, baita ohiko liburu dendetan ere.
[youtube]https://youtu.be/eA4PeF_S77A[/youtube]
