Telmo Esnalek zuzendutako Dantza, Izbrisana / Erased (Eslovenia - Kroazia - Serbia) eta Un om la locul lui / A Decent Man (Errumania) filmak hautatu dituzte Glocal in Progress sailaren lehen jardunaldirako. Postprodukzio fasean daude oraindik, eta hainbat profesionalek osatutako ikus-entzuleria bati aurkeztuko dizkiote: besteak beste, ekoizle, banatzaile, salmenta agente eta programatzaile zenbaiti, horiek gero filmak amaitzen eta nazioartean banatzen lagundu dezaten.
Dantza filma izango da Esnalek Zinemaldian aurkezturiko bosgarrena; aurrez, Aupa Etxebeste!, Amona putz!,Urte berri on, amona! eta Kalebegiak talde filmeko Septiembre aurkeztuak ditu.
Zinemaldiaren esanetan, industriaren jarduera horren helburua da "hizkuntza ez-hegemonikoetan dauden Europako produkzioei ikusgaitasun handiagoa ematea (hau da, alemanez, espainieraz, frantsesez, ingelesez, italieraz edo errusieraz filmatu ez diren filmei)".
Irailaren 22tik 30era bitartean izango da Donostiako 65. Zinemaldia.
