Valverdek, pianoan eserita, hiru poeta horien hainbat poema musikatu izan ditu bere ibilbidean, eta emanaldietarako Lauaxetaren (Mendigoxaliarena, Langile eraildu bati eta Neguko gaba), Lizardiren (Oia, Baso itzal, Asaba zaarren baratza) eta Leteren (Herri zahar honetan, Bianditz eta Amaiatu da bidaia) hiruna aukeratu zituen. Neguko gaba, Bianditz eta Amaitu da bidaia estreinakoz grabatu ditu.
Joan den irailaren 3an Donostiako Viktoria Eugenia antzokiko klubean egindako emanaldia jaso dute liburu-DVD batean. Kontzertu-errezitaldiaren ideia, ordea, orain hiru urte, Lete hil berritan loratu zen, gaur goizean Donostian egindako aurkezpenean Lertxundik jakinarazi duenez. "Leteren hainbat kantarekin emanaldia emateko deitu zioten Anttoni [Valverde] Iruñeko Hizkuntz Eskolatik. Nirekin gogoratu zen, eta deitu zidan esanez ea lagunduko ote nion kantuei sarrera bat-eta eginez. Oso gustura sentitu ginen, konplizitate artistiko bat sortu zen gure artean, eta pentsatu genuen bidea egin zitekeela". Lertxundik azaldu du bere egitekoa izan dela hiru poetak kulturalki eta poetikoki kokatzea.
2000. urtean abiarazi zutenetik, Littera&musika bildumaren barnean kaleratutako hamargarren erreferentzia da 3L-ak DVDa —hirugarrena aldundiaren sostegua duenetik—. Urtarrilean eta otsailean bi emanaldi egingo dituzte Valverdek eta Lertxundik, Iruñean bata eta Gasteizen bestea, baina oraindik ez dituzte datak zehaztu.
