40.000 kultura bonu jarriko ditu salgai Eusko Jaurlaritzak

Gabonetako kanpainarako 600.000 euro bideratu ditu Jaurlaritzak; iaz baino 60.000 euro gutxiago. Bonuak abenduaren 10a eta urtarrilaren 5a bitartean erosi ahal izango dira, eta urtarrilaren 18a bitartean erabili ahal izango dira. Merkataritza guneek, berriz, azaroaren 22a eta abenduaren 5a bitartean bat egin ahal izango dute Jaurlaritzaren programarekin. Bonuek balio dute liburuak edo musika euskarriak eskuratzeko, eta zuzenekoetarako edo bestelako ekitaldietarako txartelak erosteko, besteak beste. Programarekin bat egiten duten guneetan edo ikuskizunetan soilik erabili ahal izango dira bonuak.